Re: Cosa hè a puesia

[Cocolitoferidea]

Face più ride per tè ch'e quandu hè Lernazg.

[U Palatinu]

Lernazg ùn face mancu più ride.

[Cocolitoferidea]

Puru, era di i membri fundatori di stu situ.

[U Palatinu]

Iè, ma cosa voli fà ?

[Cocolitoferidea]

Nunda.
Ùn c'hè nunda à fà.

[Cocolitoferidea]

È què ?
Hè puesia, o micca ?
Eiu credu chì sì.

[Francesco]

Bellu bloggu!

[U Palatinu]

Tuttu esotericu cum'ellu ci piace.

[Cocolitoferidea]

Tantu megliu allora.

[U Palatinu]

A mio puesia preferita (di mè) :

Esaltazione puetica


Marchjendu per i carrughji
Di a mio terra amata
Sentu silenziosi mughji
D’una mente aggrundata
Per sti chjassi naturali,
Nant’à e strade d’asfaltu
Tanti lochi immurtali
In noi à u più altu

Aghju vistu maraviglie
Centu palmi di splendore
Di felicità vermiglie
Chì appacia u mio core
Musca a panarmunia
Stu ghjuvellu di sperenza
Tale una sinfunia
Un soffiu di quintessenza.

O ventu di finardore
Acqua cantendu libertà
Monti splendendu l’amore
Mondu chì si chjama fiertà
Tuttu si ritrova unu
In a pace di a mente
È puru firma ognunu
D’ellu, di tuttu, cuscente

Ci aghju vulsutu vede
Magnificà a bellezza
Per infine pudè crede
À stu mondu di dulcezza
Quellu mondu ch’ùn si dice
Realità tan’sacrata
Maravigliosu fenice
Verità augurata.

Chì si vede, si risente
È chì puru ùn si pò dì
Sicrettu opalescente
Mondu ch’ùn si pò trasgredì
Nisun chjama ne palesu
Ùn hè mondu veridicu
Ascosu, quasi diffesu
Hè u mondu pueticu.

Tandu mi sò dumandatu
Cosa hè a puesia
In sonniu mi sò svegliatu
Bagnatu di parusia
A dumanda hè firmata
In un illuminazione
È cusì s’hè esaltata
A mio imaginazione.

A musica di i detti ?
A dulcezza di i soni ?
Un sonniu fattu sunetti ?
Un mondu riccu di doni ?
Tante lettere ballendu ?
Un spiritu chì s’infiara ?
Un anima stantarendu
Curunata d’una tiara ?

Pensu chì à contu meu
Hè cusì a puesia
Un spiritu aereu
Rilucente d’ambrusia
Hè què, tuttu què, mi pare
Ma què ùn hè micca solu
Fattu d’armunie rare
Per alluntanà u dolu.

Pensu chì dinù si vede
Un muscu indicibile
Chì à l’incantu accede
Chjave di l’impussibile
À a magia ghjunghjemu
In questu mondu umanu
Oscuratu da u tremu
Appannatu da l’affanu.

Per quessa, a puesia
Ùn deve avè paura
D’esaltà a fantasia
Di risplende d’un aura
O d’ùn avè sensu chjaru
D’invintà parole nove
U puemu hè più caru
Fora di chjassi è prove.

A puesia libera
Ùn hà ch’e un solu sensu
Ch’e in l’emuzione vera
È u sintimu intensu
Chì in u so pettu sbuccia
D’un intimu sublimatu
Cume da una fatuccia
Splendore magnificatu.

È l’essare si sublima
In mente di u scrittore
È s’esalta quella rima
In l’ochji di u lettore
Pocu imprema u sensu
È pò dinù e parole
S’ellu c’hè piacè immensu
È l’estru ch’ellu ci vole.

[Ghjù]

MAGNIFICA DAVVERU ! Ti feliciteghju, capiscu u perchè di à to prifirenza ! Quantu tempu ai messu per fà què ?

[Francesco]

Porti veramante a Corsica nentru à u core.

[Cocolitoferidea]

A cuniscia dighjà, ma u piacè hè sempre prisente.

[U Palatinu]

Grazie mille per tanta primura, ma ùn si parla micca di a Corsica in sta puesia.

[Francesco]

Grazie mille per tanta primura, ma ùn si parla micca di a Corsica in sta puesia.

'Un si parla micca solamente di a Corsica in sta puesia, ma di a Corsica si parla...

[Cocolitoferidea]

Un altra chì mi piace monda, hè "Notte di dulcezza". Mettilla puru o Palatì.

[Francesco]

Iè.

[Cocolitoferidea]

Ùn a possu mette à a so piazza. Ùn a possu mette per ellu. Ùn ne aghju a leghjtimità.

[Francesco]

U ferà ellu, tandu.

[U Palatinu]

S'ella ùn c'hè ch'è què per fàvvi piacè...

[Francesco]

Po bastà...

[U Palatinu]

Notte di dulcezza



Mi ricordu cun ardore
Mi ricordu d’un splendore
D’una notte di dulcezza
Curunata squisitezza
D’un acqua piena di foga
D’una petra chì ci voga
Sta stella malincunia
È d’un sonniu d’armunia.

Mi ricordu cun fervore
D’un alba fatta chjarore
Tracarcata di sperenza
Muschendu la ver’essenza
D’un campà riccu di rise
Supranendu ogni crise
Nant’à un mare di grazia
Chì di schjattà ùn si slazia

Bellezza di a nuttata
Chì ribella hè firmata
Ch’ùn teme più nisun male
In a pace naturale
A serenità regina
Annienta in a pulvina
I spaventi di u core
I spavechji di tarrore.

U ventu hè messageru
Di stu mondu senza gheru
Chì trà gioie è pò guaii
Di sperà ùn pianta mai
Smarisceranu l’orrore
A tristezza, u dulore
C’hè una forza suprana
È l’aghju vista, luntana.

A pioce sparghje dulcezza
È canta cun tenerezza
U ricordu di l’epica
Di quell’antica musica
A sinfunia magica
D’una terra magnifica
D’un mondu meravigliosu
D’un ideale ascosu.

È mi canta a natura
A canzona cusì pura
Di a forza di l’amore
Cun u so versu maghjore
Chì puru pò soffre spessu
Ma chì sempre volta stessu
In l’oceanu sublimu
Di l’altu sperà ultimu.

U celu sempre ci canta
Fin ch’e a pioce ùn pianta
Senza lume ne candela
A so magia ci svela
L’invisibile esalta
Quella sinfunia alta
Chì fantastica l’avvene
Liberu d’ogni catene.

In a notte cusì bella
Vogliu aghjunghje sta stella
Sente stu cantu facondu
Chì loda u nostru mondu
Luce si face ricchezza
Ma a notte hè chjarezza
Chì annega l’amarore
In u mare di l’amore.

Diventa a fratellanza
Universale bundanza
Aldilà di e parole
Si ricrede à e fole
U tempu hè sunnulente
Passa pianu è bullente
È l’odiu s’esaurisce
Si dicade è smarisce.

Sò solu in u disertu
È puru risentu certu
In mè l’universalità
Mi pare chì l’umanità
Diventata andarina
Più ch’e mai m’hè vicina
Di u sperà u putere
Hè in mè più ch’un sapere.

Pò risentu a bellezza
U splendore, a purezza
Di a natura ribella
Chì campa prima per ella
È micca per noi stessi
Cun puteri inespressi
Risentu a creazione
U mondu hè emuzione.

Chì in u mondu interu
Tuttu hè degnu è fieru
Vogliu piccià un fanale
Chì tocca l’universale
Apre l’ochji è l’anima
Versu l’altezza ultima
Chì serà a più luntana
Di a falsità umana.

[Francesco]

Mi piace, ma ùn hè una nuvità.

[Ghjù]

Bella ! Mi pare chi hè a prima volta ch'o a vecu

[U Palatinu]

Grazie.

[Contenu sponsorisé]