Francescu Vincenti

[U Palatinu]

Si ne hè andatu à l'eternu Francescu Vincenti di i Fratelli Vincenti.
Gran diffensore di a lingua, di a cultura, è in particulare di a canzone corsa, dapoi l'anni cinquante, era, incù u so fratellu Dumenicu, unu di i primi puntelli di a canzona è di a puesia corsa.
Ancu s'elli ùn anu cantatu da per elli ch'e assai pocu (dui o trè dischi), anu scrittu à bastanza, è tant'e più, per i più grandi cantatori corsi, cume Antone Ciosi, Marisa Nicolai, è tant'altri, canzone cume "Traculinu", "Casa antica", "Chì fà", "U Ritrattu", è tant'e più... ci ne sò tante ch'ùn possu menziunà tutti i so tituli.

Un puntellu era. Eri in u mare di l'immurtalità si ne hè andatu.
Ch'ellu riposa in pace per l'eternità !

[Culunellu di Vinciguerra]

Trista nutizia ch'e quessa quì.
Ch'ellu riposa ormai in pace è ch'e l'eternità li sia dolce. L'hà propiu meritatu.

[Cocolitoferidea]

L'anima corsa hè in dolu.

[Francesco]

M'associu: a cultura in ghjenerale hè in dolu.

Nisun omu hè un isula, quandu si perde u "pezzu" di u cuntinente, l'umanità sana hè più povara.

[Cappellurossu]

Averà raghjuntu à Carlu Rocchi, Natale Luciani, Natale Rocchiccioli, Bartulumeu Dolovici, Marcellu Acquaviva, Rinatu Coltelloni, Ghjuliu Bernardini, è tant'altri pueti (per ùn cità ch'e i "muderni") di l'anima corsa prufonda, chì anu stampatu nant'à un fogliu l'inchjostru di a so pinsata.

E mio parte afflette à u so fratellu Dumenicu è à tutti quelli chì u tenianu caru.

[U Palatinu]

Seria ora ch'o priparessi un articulu ommagiu, nò ?

[Francesco]

L'aspettu incu' piace'.

[U Palatinu]

Si pripara.

[Cocolitoferidea]

Aghju cunfianza.

[U Palatinu]

Francescu Vincenti si ne hè mortu !
Oghje, dopu à tante settimane di silenziu, ripigliu a pena per rendelli ommagiu, quasi duie settimane dopu. Ma u mio ommagiu, puru tardivu, ùn ne hè menu sinceru. À u cuntrariu vogliu salutà a so memoria.
I dui fratelli, Francescu è Dumenicu Agostini, di u paese di Santa Riparata di Balagna, passonu una grande parte di a so ghjuventù in Parigi, duv’elli piglionu u so gustu per u cantu in generale è per u cantu corsu in particulare, chì puru tandu, ùn era cusì sviluppatu ch’e oghje. E so influenze fubbinu multiplice, in particulare da Leo Ferré à Georges Brassens, i più grandi cantatori francesi di st’epica.
Passonu più d’un mezu seculu, tra e sale di spettaculu di Parigi è quelle di Corsica, in particulare in Balagna in a so osteria « Les trois guitares », duv’elli cantonu è incantoni tanti clienti venuti à vedelli è sente cantà durante anni è anni.
Scrivonu più di 200 puesie o canzone, di qualità cume tante testimunianze d’amore per a so lingua, per u so paese, o simpliciamente per l’arte di a puesia ella stessa. 200 puesie fra e quale tante firmonu famose, è franconu altamente u cateru di u tempu, firmendu cusì tenute care, ancu quaranta o cinquant’anni dopu à a so nascita.
Ma elli stessi, s’elli scrivonu assai, cantonu pocu. Ùn arricurdonu, a so vita sana ch’e sei dischi ch’ùn escinu mancu tutti in CD. U solu à ùn esse scarsu, ancu in i magazini spezialisati, hè a raccolta Da Sottu à la mio baretta di qualchidune di e so canzone e più famose.
Chì più ch’e cantà, i Fratelli Vincenti anu sempre preferitu scrive per fà cantà i so amichi, cantatori corsi fra i più famosi. Da Antoine Ciosi (chì i dedicò un discu sanu cun solu e so canzone), à Maryse Nicolai, senza parlà di e riprese cusì multiplice, fubbinu numarosi à dà a vita à e canzone di i Fratelli Vincenti.
A so prima canzona veramente emblematica, Dìmmi perchè, fù tandu scritta da Francescu Vincenti, u maghjore di i dui fratelli, parechje decenie fà. Canzona d’amore addisperatu, Dìmmi perchè hè una chjama d’un amante tralasciatu chì si lagna è canta à l’esse amatu, u perchè di a morte di l’amore. A forza pudente di sti versi aldilà di u latu simbolicu di a puesia ùn pò ch’e ispirà, nant’à quellu chì l’ascolta, un infinità di sintimi sfarenti, andendu da a tristezza, a cumpassione, l’ammirazione di a bellezza di ste poche parole messe une apress’à l’altre, o tant’altri sintimi, ma sicuramente micca indiffarenza.
I Fratelli Vincenti ùn eranu ch’e à u principiu di cio chì devia duvintà, senza ch’elli ne ebbinu tandu pigliatu cuscenza, a so carriera, ma s’e u talentu devia più tardu accertàssi ancu più forte, u fiatu era dighjà prisente. Puru u meccanisimu era dighjà iniziatu, è u destinu di sta canzona devia purtà cun ella quellu di u so autore. In pochi tempi, à un epica duve Carlu Rocchi era quasi u solu cantatore corsu in lingua corsa, allora chì a prudessa di Felice Quilici ùn era ancu vechja, (sceffu d’orchestru corsu chì pocu dopu a guerra, avia girandulatu in tutti i paesi di Corsica per arricurdà i vechji canti tradiziunali cantati in i paesi), Dimmi perchè diventò a canzona corsa d’amora fra e più famose, à tal puntu, chì ancu Tino Rossi dumandò à i dui fratelli l’autorisazione di cantàlla.

Ma a ballana ùn si devia piantà custì. Perseguitendu e so scritture, i dui fratelli feci nasce da a so piuma dinamica ispirata d’una musa vagabonda un autenticu mazzulu muscosu di puesie, prestu diventate canzone, da per elli, o in a bocca di i cantatori corsi di st’epica mezana, tra a fine di l’epupea Quilici è u principiu di u Riacquistu. U più cunisciutu di sti cantatori hè u Casinchese Antone Ciosi, chì cun a so bella voce calda, feci campà cum’ellu si devia, tant’e tante belle canzone di i Fratelli Vincenti. L’associu era tale ch’e prestu u successu d’Antone Ciosi risorgì nant’à i dui fratelli.

Tutti avemu sempre in mente parechje di ste canzone di i fratelli Vincenti cantate da Antone Ciosi, cume per esempiu Tragulinu, canzona magnifica, chì in poche parole ancu puru simplice, anu sapiutu fàcci risente tant’emuzione per invitàcci à seguità u viaghju di l’anticu tragulinu. Cumu ùn parlà di Casa antica di paese, altra canzona di i dui fratelli, un pocu più larga ch’e a precedente, chì alleghendu u ritimu di e rime è quellu di a musica, hà sapiutu fàcci risente tante cumpassione per ste vechje case di paese, spessu abbandunate, chì più ch’e noi, si sentenu perse à a nostra epica muderna, ma chì sempre fermeranu fide à l’anima corsa chì l’avia figliulata. Corri corri o zitellina¸ dinù, hè un veru innu à a zitellina è à a gioia ch’ella ispira ; sta canzona chì ci permette, senza lamenti ne nustalgia eccessiva i milli piaceri di a zitellina di i tempi andati. Sott’à u tigliolu, dinù, m’hè piaciutu particulariamente più ch’e d’altre, chì a canzona, dinamica, hè un veru chjam’e rispondi tra dui persone, dui genitori, da i quali u figliolu di l’unu è a figliola di l’altru si friquenteghjanu, è mentre chì unu di i dui si n’inchieta, l’altru u vole apacià è rassicurà nant’à l’intenzione di u so figliolu per a so figliola. Sta canzona fù dinù cantata da Antone Ciosi è Jacky Micaelli.
U Ritrattu, dinù (canzona spessu chjamata, à tortu, A vechja Maria), sott’à a bella è dolce voce di Marisa Nicolai, ci purtò tuttu in l’emuzione d’una povara veduva chì avia vistu u so ghjovanu maritu parte per a guerra (a Prima Guerra Mundiale) è ùn vultànne micca. Ci vole à dì chì sta canzona era ispirata d’una zia di i dui fratelli, cosa chì a rende ancu più pugnente. In stu sensu, raghjunghje un pocu a canzona Trente neuf quarante, scritta in francese, chì dà a voce à un zitellu chì hà vistu parte u so babbu per a guerra, è vultànne murendu.
Ci tocca dinù di parlà di a canzona Chì fà, lamentu acutu è precisu, ancu s’e u ritimu di u cantu ùn hè quellu d’un lamentu, in a quale, in poche parole, dicenu tuttu cio ch’ùn và in a Corsica muderna. Sta canzona, ancu puru scritta in l’anni settanta, hè disgraziamente sempre d’attualità, è porta in ella una vera sumenta di cuscenza pulitica corsa, ben ch’e i Fratelli Vincenti ùn fubbini micca veramente cantatori ingagiati à u sensu classicu di u termine. U dibattu firma apertu nant’à stu puntu, ma ci tocc’à dì, maliziosamente, chì à l’epica duve a Corsica s’infiarava à l’epica d’Aleria, è ghjustu dopu, ma ancu sin’avà, ogni volta ch’ellu si sentia « chì fà ? », certi, maliziosi, invece di risponde « chì ci si pò fà ? » (e vere parole di a canzona), rispundianu, è rispondanu sempre… un altra versione.

Pò, dopu à tanti ghjorni è tante sere d’un successu mai traditu, i Fratelli Vincenti si ritironu in u so paese, o ancu in a so osteria d’Algaghjola « Les trois guitares », duv’elli cuntinuonu di cantà à l’uccasione, per i so amichi, intratenendu cusì a fiamma di u ricordu.

Ben ch’e anzianette, e canzone di Francescu è di Dumenicu Vincenti anu sapiutu firmà ghjovane, prima perchè eranu troppu sulcate in u ricordu cullettivu per smarisce sott’à l’assalti di u tempu. Certi anu pussutu crede un tempu, ch’e ste canzone invechjerianu male incù u soffiu novu di u Riacquistu. Ùn hè mai statu u casu.
Perchè anu sappiutu fà passà in e so puesie un anticu stintu corsu naturale, sprimendu in elle un sintimu ch’e no risentiamu senza esse capace di sviluppà, o perchè simpliciamente, a rima di i Fratelli Vincenti, incù a so simplicità hà sapiutu entre in l’universale. Ella sà cuntàcci, in poche parole, tuttu cio chì custitueghja l’Anima Corsa, à u stessu livellu ch’e e canzone di Carlu Rocchi, à u livellu spirituale. Ci conta dinù i castighi di u tempu è di a mudernità, dendu a parola à tuttu cio ch’ùn hè più ch’e in u ricordu cullettivu, ch’e no intratenemu tutti cume una fiamma sacrata.
M’hè difficiule di sviluppà nant’à u fogliu incù simplice parole u perchè di l’emuzione risentite incù ste canzone anziane chì puru ùn seranu mai vechje. À quale ùn l’hà mai intesu ùn pò capì e mio parole, ma pensu, è spergu chì quelli chì cunoscenu ste canzone raghjunghjeranu a mio analisa.


Oghje, Francescu Vincenti, u maghjore di i dui fratelli, si n’hè andatu à vugà nant’à u mare di l’infinitu, raghjunghjendu di sicuru un paradisu di l’anima corsa eterna, o quellu di i pueta i più sinceri. Chjodu stu picculu ommagiu prisententu e mio parte à u so fratellu Dumenicu.
U pueta hè mortu, ma a so opera ferma sempre viva, è l’anima corsa hè eterna.

[Francesco]

Bellu ommagiu! Pienu di sentimi.

[Cocolitoferidea]

Ùn averemu micca aspettatu in vanu.
In più di què, si vede dinù anant'à u to bloggu.

[U scemu compiu di u paese]

Aghjustà qualchi testi per cumpie l'ommagiu seria perfettu.

[U Palatinu]

S'o aghju u tempu.
Ossinò, fàllu tù.

[Cocolitoferidea]

È s'e nimu di voi trè u face, u facciu eiu.

[U scemu compiu di u paese]

È à a fine, ùn l'avete fattu.

[Cocolitoferidea]

O Carlos, si spessu una sega.

[Cocolitoferidea]

Dimmi perchè


Dimmi perchè tù non rispondi
À lu me cantu dulurosu
Dimmi perchè tù mi cunfondi
Quandu per tè so malorosu

Dimmi perchè li nostri amori
Cume lu ventu si ne vanu
Dimmi perchè cume li fiori
L’aghju tenu pochi i manu

Dimmi perchè tante prumesse
S’hannu pigliatu lu me core
Dimmi perchè le to carezze
Per mè ùn n’hannu più calore

Dimmi perchè la mio sperenza
Cume le stelle sa da spinghje
Dimmi perchè cum’u orfagno
L’anima mia non po che pienghje

Dimmi perchè tù hè finitu
Le pruminate è le canzone
L’estate ind’o ghjardinu
È l’inguernu à u to fucone

Dimmi perchè i sirenadi
U naprianu più lu to core
Dimmi perchè li mi vint’anni
Senza tè bramanu di more
Dimmi perchè


I Fratelli Vincenti

[Cocolitoferidea]

U Tragulinu


Porti li to settanta anni
Cum’è fiori di castagni,
Tragulinu,
E sott’à lu to capellu
Ai l’ochji d’un zitellu,
Tragulinu,
Solu la to barba bianca
Dice chi a to vita hè stanca
Tragulinu, Tragulinu.

A scala di Santa Regina
Di nuttata o di matina,
Tragulinu,
L’ai pigliata trent’anni
Piattendu li to affanni,
Tragulinu,
Di tè dicenu à l’Acquale
Chi un temia tempurale,
Tragulinu, Tragulinu.

Ai ancù un certu ricordu
D’un banditu di u Fiumorbu,
Tragulinu,
Chi pigliatu di suspettu
T’hà messu u fucile in pettu,
Tragulinu,
Mà banditu era d’onore
E t’hà lasciatu discore,
Tragulinu, Tragulinu.

Per da capu à u friscone
Ai fattu casa è fucone,
Tragulinu,
Mà quand’ella piglia forza
U so lagnu à la to porta,
Tragulinu,
Sparghji u to vechju pilone
Sott’à qualchi muraglione
Tragulinu, Tragulinu.

Parteristi ancù in viaghju
Mà ti resta pocu fiatu,
Tragulinu, Tragulinu.


I Fratelli Vincenti

[Cocolitoferidea]

Casa antica



Casa antica di paese, a nostra epica ti pesa
Quandu da lu to scalone, ne parla un antru patrone
Sterai sempre listessa si nun vene qualchi stranu
A fatti un’antra bellezza cù la so mescula in manu.

L’anni sò annantu a facciata, scritti di vecchja calcina
Si a cugnola è affaccata, un’hè micca una ruina
Nantu u tettu sculuritu, un fume di muchju seccu
Si ne và cume spavitu, un simu senza suffiettu.

A cavalle a duie legni, u trepede s’allegrisce
Davanta a fiara chi pienghje, u ghjattalellu s’allisce
Dalla a to stanza a sullana sentu u rimore in cucina
In piazza hè ghjunt’a fasgiana, c’hè qualche sia in cantina.

A pulizia di Pasqua, un ti lascia senza aiutu
E vene ne vanu all’acqua è mettenu u chjassu a nudu
Per u focu di natale ognunu face un rigalu
U riccu mette una ceppa è tu a to legna secca.

A quellu chi passa solu, stancu assai è furesteru
Quandu tu li faci mottu, li cacci cume un penseru
Nulla un anderà di male, di ghjorni di tempurale
Si nant’u to purtelone mette un pane di Sant’Antone.

Casa antica di paese, oghje più bella che prima
Che l’appia forze di legge, per salvati la mio rima
Si tu cambie di patrone, guarda ch’ella sia Corsu
Ellu hè natu testimone, dunque spostu a lu rimorsu
Si tu cambie di patrone, guarda ch’ella sia Corsu
Ellu hè natu testimone, dunque spostu a lu rimorsu.


I Fratelli Vincenti

[Cocolitoferidea]

Sott’a u tigliolu


O Dumme sott’a u tigliolu vegu sempre u to figliolu
Appress’a mo Nunziata ch’un possu tene liata
Guarda chi se criature a mumenti so mature
E u to masciu è schirinatu cume un omu trapassatu
A una Mamma tocc’a dilla eo un so cusì tranquilla
A stu gallu chi risplende una pullezza si rende
E a mea si cunsume a puliscesi e piume

Chi mi canti quì per baccu tu chi si sempre in affaccu
A chjamati sentinella a prima è a to zitella
A l’affari di natura ci metti troppu primura
A sentela so capiscu un ti manca che u fiscu
S’ella’hè bella cume un fiore quella chi ti face onore
Un l’ha t’aghju mai detta ma si veste troppu stretta
Tu voli la mo pensata mi pare bell’avanzata

Oghje sti dui culombi fiori ne coglienu mondi
E quellu che l’anu a scieglie un ha ancu fatu mele
Ma tu ha mo Nunziata ha vedi prestu spugliata
E quellu che schirinatu hè un pezzu ch’ellu ci ha pensatu
M’hai parlata in finezza rispondu in delicatezza
Un hè anc’a vene l’ora ch’ella sia moglia e nora
Un hè cusì avanzata tu l’hai troppu vantata

Ava sì chi m’interessi sentu che tu ti cunfessi
Hè veramente un peccatu ch’un sia micca curatu
Dicerebbe o cristiana un hè micca ind’una tana
Nunzia sott’a u tigliolu ch’un bellissimu figliolu
Per un esse che u meo un serà micca u peghju
Ha u so certificatu u so pane assicuratu
Chi ti possu di megliu che l’hè bravu stu zitellu.

Che l’hè bravu stu zitellu


I Fratelli Vincenti

[Cocolitoferidea]

Corri corri o zitellina


Cum’elli so belli l’anni
Verdicenti e spenserati
Anu un nome zitellina
Bellu cum’e cardellina

Elli ancu senza chjamassi
Piglianu listessi chjassi
Sanu chi per campà un’ora
Ci vole a passalla fora

Fora ci so tutte ripe
A barcà cume scaloni
Ci hè un fiume cu l’anguille
E un ortu pien’a miloni

Per finisce la ghjurnata
Chi un è mai straziata
Ci hè sempre ind’e qualchi chjosu
Un sumere laziosu.

Corri corri o zitellina
Corri un ti lascia piglià
Fà cum’e a cardellina
In gabbia un ci vole sta

Corri corri o zitellina
L’amore ti ha da piglia
Di ghitarra e mandulina
O cum’ellu sa ghjucà.

Cum’elli so belli l’anni
Chi si sveglianu stunati
Di sente cume una pena
Ch’elli volenu catena

Un la dicerai a nimu
Anu sceltu u so caminu
Oramai so sicuri
D’esse di core maturi

Zuccati nantu a le porte
Di legnu anticu u più forte
Nomi chi vanu per coppii
Cuantu ci n’hè micca rotti

Pochi pochi ma so muche
Chi fanu sputa una luce
E una canzona argentina
Cume tutta a zitellina.

Corri corri o zitellina
Corri un ti lascia piglià
Fà cum’e a cardellina
In gabbia un ci vole sta

Corri corri o zitellina
L’amore ti ha da piglia
Di ghitarra e mandulina
O cum’ellu sa ghjucà.


I Fratelli Vincenti

[Cocolitoferidea]

Chi fà ?


Rimore di legne tronche
E luce rossa di fornu,
Di mandili stretti in fronte
Un aspettate ritornu,
Ogni petra neru fume
Pianu pianu s’hè staccata
Per fà piazza à un altru lume
Nantu a teghja addisperata,
Eo chi mi sò scallatu
Qualchi volta à la so fiara
Mi pare tantu peccatu
Chi a rivecu ancù più chjara.

Chi fà ? chi ci si pò fà ?
Chi fà ? chi ci si pò fà ?


Ancù e nostre merie antiche
Unu à unu si ne vanu
Per d’altre case più riche
E di noi assai luntanu,
Ci spechenu di l’antichi
I caccemu di paese
Nantu a grate ùn ci hè più fichi
Si campa à l’usu francese,
Eo chi mi sò campatu
C’un pezzu di pane intintu
Mi pare tantu peccatu
Chi mi sentu u core strintu.

Chi fà ? chi ci si pò fà ?
Chi fà ? chi ci si pò fà ?

Ind’è tutta la cunfine
Eri tutta la cunfine
Eri suminata à granu,
Oghje sò e cardelline
Chi cantanu lu veranu,
A u sole nantu à l’aghja
U tribbiu pare fermatu
E d’un esse a meza paglia
Si sente cum’è spugliatu,
Eo chi mi sò svegliatu
Sta mane cum’è un acellu,
S’aghju troppu sunniatu
Perdunerete un zitellu.

Chi fà ? chi ci si pò fà ?
Chi fà ? chi ci si pò fà ?


I Fratelli Vincenti

[Francesco]

Wow! eranu bravi!

Aghju trovu dinù l'urighjne di a frasa "chì fà, chì ci si pò fà"

PS Perchè si signavanu "I fratelli Vincenti"?
(va bè chì erano dui, ma scrivianu e sò puisie à quatru mani?)

[U scemu compiu di u paese]

Anu sempre signatu cusì, senza precisà u quale di i dui era l'autore.
Senza scurdàssi chì u so veru nome era Agostini.

Ma quantunque, i testi dati da Cocolitò sò pieni di sbaglii.
Mi pare straniu.

[U Palatinu]

Dipende di quale hè chì l'hà riscritti.

[Cocolitoferidea]

Anu sempre signatu cusì, senza precisà u quale di i dui era l'autore.
Senza scurdàssi chì u so veru nome era Agostini.

Ma quantunque, i testi dati da Cocolitò sò pieni di sbaglii.
Mi pare straniu.

Aghju trovu nant'à Internet.
Postu ch'e erite pressati, ùn aghju micca fattu un travagliu di rilettura.
È u peghju hè... ch'ùn culpevuliseghja manc'una seconda.

[Francesco]

Eu (quale sà perchè? ) ùn aviu mancu rimarcatu li sbaglji.

[Cocolitoferidea]

Chi fà ?


Rimore di legne tronche
È luce rossa di fornu,
Di mandili stretti in fronte
Un aspettate ritornu,
Ogni petra negru fume
Pianu pianu s’hè staccata
Per fà piazza à un altru lume
Nantu a teghja addisperata,
Eo chi mi sò scallatu
Qualchi volta à la so fiara
Mi pare tantu peccatu
Chi a rivecu ancù più chjara.

Chi fà ? chi ci si pò fà ?
Chi fà ? chi ci si pò fà ?

Ancù e nostre merie antiche
Unu à unu si ne vanu
Per d’altre case più riche
E di noi assai luntanu,
Ci spichenu di l’antichi
I caccemu di i paese
Nantu à a grate ùn ci hè più fichi
Si campa à l’usu francese,
Eo chi mi sò campatu
Cun’un pezzu di pane intintu
Mi pare tantu peccatu
Chi mi sentu u core strintu.

Chi fà ? chi ci si pò fà ?
Chi fà ? chi ci si pò fà ?

Ind’è tutta la cunfine
Eri suminata da granu,
Oghje sò e cardelline
Chi cantanu lu veranu,
A u sole nantu à l’aghja
U tribbiu pare fermatu
E d’un esse à meza paglia
Si sente cum’è spugliatu,
Eo chi mi sò svegliatu
Sta mane cum'un acellu,
S’aghju troppu sunniatu
Perdunerete un zitellu.

Chi fà ? chi ci si pò fà ?
Chi fà ? chi ci si pò fà ?


I Fratelli Vincenti

Qualche piccule curezzione.

[U scemu compiu di u paese]

Pocu à pocu, si megliureghja.

[U Palatinu]

Manca sempre "U Ritrattu", ma u cercheraghju.

[Culunellu di Vinciguerra]

U facciu eiu chì cusì hè fattu.

U ritrattu


O cusi bellu ghjuvanottu, ch’hè sparitu a fior di l’età
Hè partutu eramu in diciottu, cun prumessa di riturnà
Aghju ind'e l’arecchja a scarpada di u suldatu chi si ne và
U vecu falà per a chjappada dicendu : ô Mari’ un ti ne fà !

U ritrattu nantu a muraglia, hè una vera calamità
Stringhje u core cum’a tanaglia di quella ch’ùn si po scurdà
Cusi dice a vecchja Maria,quand’ella si mette à pensà
À u suldatu d’infanteria, inquadratu tant’anni fà

Eu mi ricord’una sera, m’ha dettu pigliend’u caffè
Ùn vole finisce sta guerra, prestu credu tuccher’à mè
E allora m’a fattu sposa,pocu tempu vogliu vene a dì
U tempu di lascià una cosa, chi dica qu’ell’hè statu qui

U ritrattu nantu a muraglia, hè una vera calamità
Stringhje u core cum’a tanaglia di quella ch’ùn si po scurdà
Cusi dice a vecchja Maria,quand’ella si mette à pensà
À u suldatu d’infanteria, inquadratu tant’anni fà

Hè ingrandata a nostra figliola, senza cunosce u so babbà
Di u ritrattu nant’à cummoda, un si ne pò arricurdà
S'e tu voli un santu destinu,per i to figlioli ò Gesù
A tenuta di pannu turchinu, fà ch’ell’un si veca mai più

U ritrattu nantu a muraglia, hè una vera calamità
Stringhje u core cum’a tanaglia di quella ch’ùn si po scurdà
Cusi dice a vecchja Maria,quand’ella si mette à pensà
À u suldatu d’infanteria, inquadratu tant’anni fà
È dipoi a Vecchia Maria,u mandile un si caccia più
I zitelli à chjamanu “zia” dannu un fiore di ghjuventù

[Culunellu di Vinciguerra]

[Culunellu di Vinciguerra]

Disgraziamente, ùn aghju trovu a versione di Marisa Nicolai.

[Culunellu di Vinciguerra]

Chì fà (da Antone Ciosi)

[Cocolitoferidea]

Grazie o Culunè.

[Francesco]

[U scemu compiu di u paese]

Belle videò.

[u Faiu]

Ommagiu à un gran pueta chì si ne hè andatu à l'eternu. Era un epica, è pocu à pocu, si compia.

[U scemu compiu di u paese]

Chì fà ?
.................. !

[U Palatinu]

Cosa hè a seconda linea ?

[Cocolitoferidea]

Pensu chì l'induvinemu tutti.

[Cappellurossu]

Innò.
Micca tutti.
Certi sò baulli, sai !